خالد الصاوي في حوار مفتوح مع جمهوره

يتخذ الفنان خالد الصاوي أسلوبا جديدا للتواصل مع جمهوره من خلال الأنترنت،
يتبعه منذ فترة من خلال مدونة يتواصل بها مع عالم المدونين khaledelsawy.blogspot.com، وله على صفحة معجبين على الفيس بوك، وله حساب خاص على الفيس بوك أيضا يتفاعل فيه مع جمهور الفيس بوك العريض

وقد أثار خالد الصاوي قضية كثرة عدد مسلسلات رمضان الذي يشارك فيها هذا العام بمسلسل قانون المراغي:
افتتح الصاوي حواره مع جمهوره من خلال (status) الفيس بوك الخاص به، بقوله:
"أنا أفهم إن الواحد يشتكي من إن المسلسلات قليلة، لكن إنه يشتكي إن المسلسلات كثيرة فده غريب شوية على مخي المتواضع، ما تركز مع كام ممثل انت بتثق فيهم وخلاص، مهواش واجب قومي يعني إنك تشوف كل المسلسلات".
وجاء الحوار الشيق بين خالد وجمهوره كالآتي:
أحمد صالح: المسلسلات لما تكون كتير ومتنوعة يبكون شى جميل، لكن المشكلة ان فى ممثلين بيظهروا فى اكتر من عمل واحد، يعنى حصل معايا موقف كنت بتفرج على مسلسل وجاء فاصل غيرت لحد ما الفاصل يخلص، نسيت انا كنت على اى قناة، رجعت لقيت الممثل اللى كنت بتفرج علية، ولكن الاحداث متغيرة شوية، اكتشفت ان دا مسلسل تانى خالص غير الأولنى..
ياسر السيد: المشكلة أن في إعلان عن المسلسل اللى منتظره بتدور عليه نص رمضان لغاية لما تلاقيه، وبعدين التخمة دى مش فى الصالح العام للمثل أو المسلسل مواعيد الشغل ومواعيد المتابعة مش متوازنة وبعدين بجد المتابعة بتكون احسن بعيد عن زحمة طقوس رمضان
خالد الصاوي: العدد الكبير مش صح للمنتجين وللنجوم فقط، لكن بالنسبة لكل الفنانين -أمام وخلف الكاميرا باستثناء النجوم- والفنيين والعمال فده مصدر رزق مهم + انه تدريب متواصل، أما بالنسبة للمشاهد فده شيء صحي جدا لأنه بيديله مساحة أكبر من الاختيار، وبيكسر حالة الاحتكار اللي على عينيه ومخه.
ياسر السيد: فاكر رمضان بتاع المسلسل الواحد والفوزاير كان حكاية تانية.... فاكر السبعينات يا راجل
خالد الصاوي: بالنسبة لمرحلة السبعينيات لما كان مسلسل واحد وفوازير وكده فده شكل انتهى بفعل التطور العصري، وكويس انه اتغير لانه نوع من الاستبداد برضه، والاستبداد ده على المشاهد وعلى الفنانين، دلوقتي عندك الحرية تشوف اللي انت عاوزه والفنان له الحرية نسبيا في التعامل مع المنتجين.
أحمد صالح: المشكلة أن المسلسلات كلها بتكون شبهة بعضها، نفس شكل الديكور نفس الحارة نفس الاكسسوار والسيارت والموضوعات وحاجات كتيرة جدا مش مقنعة مفيش اهتمام بالإخراج أو التصوير والابداع فى كل عناصر العمل باستسناء بعض الاعمال.
بسنت دبور: الإعلانات إللى فى الفواصل بتشتت الواحد وبتنسي أحداث المسلسل وبلاقى الحل الوحيد التجول بالريموت كنترول عبر باقى القنوات على ما يخلص الفاصل الإعلانى المحصلة إن فى الساعة الواحدة ممكن نتابع أكتر من مسلسل على أكتر من قناة
وداد سيد: شوف انا من اول يوم اخترت مسلسلين عشان اتابعهم، طبعا لأن مش كل رمضان للمسلسلات.
خالد الصاوي: أولا الانسان اللي يلهيه مسلسل عن عبادته ده مؤمن تعبان، لكن رمضان مش مقصود بيه إعدام كل أشكال المتعة والتسلية وإلا كان اتحرم الرفث مثلا، ثانيا المسلسل بيتعرض بعد رمضان على قنوات كثير. ثالثا فيه عدة مواعيد بث لكل مسلسل أثناء رمضان. رابعا فيه كلفتة طبعا وهرجلة في شغلنا لأننا جزء من منظومة اجتماعية وإدارية ضايعة في البلد كلها وعلاجها سياسي بالأساس
كل قصدي اننا نوصل دايما السبب بالنتيجة مضبوط، ميدان الفن وميدان الإعلام وميدان الثقافة محتاجين عمرة لأن كل مياديننا محتاجة عمرة وبعضها محتاج إحلال.
ويوجه الصاوي خطابه الي الجمهور: انتم اللي في أيدكم تغيروا التركيبة دي جزئيا، لما الجمهور بيدعم فن معين بيضطر المنتجين يستجيبوا له، ولما الجمهور بيدافع عن فن معين بتضطر السلطة تخفف ايدها عن رقبته
الخلاصة: عدد المسلسلات الكبير مش هو المشكلة في رأيي، ولكن فوضى البث والخدمات الاعلامية المصاحبة من جهة واضطراب الاحترافية المهنية من قبل مؤسسات انتاج وتسويق الفن هم المسئولين عن الحالة السلبية اللي انتم حاسينها.
اغرب حاجة النهارده حصلتلي اني بسأل صديقة قديمة بتشوفي انهي مسلسلات؟ فلقيتها ردت بتشنج: انا مقاطعة كل المسلسلات لانها كثير قوي السنة دي... قلتلها طيب كده انت بتعاقبي مين بالضبط ما تشوفي كام حاجة وخلاص.. فلقيتها بتشتم في المسلسلات وابطالها رغم انها قالت انها ماشافتش حاجة.. واحدة واحدة فضلت وراها لما لقيتها مصرة تشوف كل المسلسلات عرض اول فشرحتلها ان ده مستحيل لتناقضه مع قوانين الفيزياء.
أحمد مجدي توفيق: طيب احنا كمتفرجين فى ايدينا ايه حضرتك عارف ان ممكن مسلسل يتعرض ومحدش يتابعه ويكسب برضه !! لانه انتاجه ضعيف وبيتباع عليه اعلانات فبتكون المحصلة المادية بالموجب
خالد الصاوي: الاعلانات بتيجي على اساس كمية المشاهدة، لما الجمهور والاعلام المستقل وجماعات الضغط الفنية والثقافية تبدع وسائلها لتكوين رأي عام الأمور بتتغير.. كده كده الرأي العام بيتكون ولكن في ايدكم تسرعوا وتيرة تكوين الرأي العام وتبرزوه لغاية ما يبقى هو المسيطر
مثال: مش اتغيرت السينما المصرية قدامنا مرتين في عشر سنين؟ المرة الاولى مع النجاح الهستيري لاسماعيلية رايح جاي دخلت المعادلة كتلة رهيبة جديدة من مشاهدي السينما هي الشباب وده قلب الموازين تماما لنوع افلام غير الثمانينيات والنصف الاول من التسعينيات.. بعد شوية الناس لقت ان النوع ده مش كافي لوحده فنجحت عمارة يعقوبيان وبالتالي ارغمت رأس المال انه يلتفت لسينما جادة جديدة جنبا الى جنب مع نوع الافلام الاقدم..
أحمد مجدي توفيق: أنا بحس إن تأثير الجمهور على السينما أبلغ من التليفزيون لأن جمهور السينما بيترجم لأرقام وإيرادات انما جمهور التليفزيون اعقد شوية ولا حضرتك مش معايا ؟
خالد الصاوي: دورة تكوين وبروز رأي عام في السينما أسرع مش أكثر، لكن الأساس واحد، لو الجمهور دعم فنان بقى الفنان نجم ولو بقى نجم بقى سلعة ولو بقى سلعة حتسري عليه قوانين العرض والطلب وبالتالي حتزيد او حتقل الاعلانات على مسلسله
ولأن الجمهور مش حاسم في توجيه رسالته للمنتجين، الرسالة اللي بتوصل للمنتجين ان الناس بتحب فلان فحتشوفه حتى لو العمل تعبان او لو فلان نفسه بقى تعبان، مرة تانية بقول لما الجمهور وجماعات الضغط الثقافية والاعلامية والفنية المستقلة بالذات تنجح في تشكيل الرأي العام وابرازه حيضطر الجميع للاذعان له، لكن طول ما الناس بتاكل من اللي بيتقدملها وتسكت مفيش تغيير حيحصل واذا حصل بيبقى تغيير عشوائي وبطيء، وده يصدق على جمهور الفن كما يصدق على الشعب كله، لو معندكش رأي عام قوي تبقى الدولة مش حتستجيب للناس.
ويتابع الصاوي: النهارده فيه انترنت وفيه قنوات كثير جدا وفيه فرق مسرح مستقلة وسينما مستقلة واعلام بديل، وفيه جمعيات للفن والثقافة، لو كل ده تم استخدامه بكفاءة اكيد الصورة حتتغير، لو فيه جمعية جديدة اسمها مثلا الدفاع عن ذوق الجماهير واشتغلت بجد حيطلع وراها جرنال متخصص في تحليل الاعمال بحيادية وعمق وحيطلع وراهم مهرجان مخصص للنوع ده من الاعمال وهكذا.. الفن في مجتمع اليوم مجرد سلعة للأسف، سيطرتك عليها ضعيفة زي سيطرتك على كل السلع ما هي ضعيفة ومع ذلك لك قوة انك ترفضها او تقبل عليها، والفن الرديء لا يعيش ابدا الا لو المجتمع فيه حتة رديئة
ياسمين حمزة الشيمي: في سؤال بدر إلي ذهني ؟هو مين يا جماعة ربط رمضان بوجه عام بالمسلسلات والأعمال ذات الإنتاج الضخم هل المنتجين ولا الممثلين ؟ولا شركات التسويق والتوزيع انا بحس انهم فاكرين الناس واخدة أجازة يعني غير موضوع العبادة وصلة الرحم والعزومات اللي مرتبطة برمضان، هو مش فيه إختراع اسمه شغل الناس حتابع كل ده ازاي.
خالد الصاوي: سعد زغلول قال مفيش فايدة من التفاوض مع الانجليز، اما لو حندور على مين ربط رمضان بالمسلسلات فحنلاقيه تلفزيون الحكومة من ايام فوازير ثلاثي اضواء المسرح، ولو حندور ازاي جت في دماغ تلفزيون الحكومة حنلاقي ان الشعب كله من زمان جدا بيربط فترة الصوم بالتسالي اللي بتضيع الوقت خصوصا قبل الفطار بساعتين، ثم تحول الموضوع الى ربط التسلية بالتحلية بعد الافطار، ولو حندور مين ربط رمضان بالتسلية والتحلية حنرجع للفاطميين، طيب جابوها منين؟ من الأمويين قبلهم.
وفي النهاية ختم الصاوي حواره مع جمهوره ب: "شكرا جميعا على التشات اللذيذ ده واتمنالكم الاستمتاع ببقية رمضان بما يتفق والشهر الكريم من ناحية وفي اطار الوسطية الجميلة اللي في الشخصية المصرية طول عمرها من ناحية تانية.. لاني مؤخرا بدأت اسمع كلام دمه مش خفيف من عينة فلنقاطع التلفزيون في رمضان، وده في رأيي مش ايجابي خالص ومش بتاعنا ومش في صالحنا على المدى الطويل والأجدر بنا هو البحث عن طرق تساعدنا على النهوض بثقافتنا واعلامنا وتطوير علاقة الفرد بدينه وبدنياه معا.